Нема производи.

Марија Шапкарова, нов член во тимот на Антолог

  /  Специјалитет на куќата (Антолог препорачува)   /  Марија Шапкарова, нов член во тимот на Антолог

Марија Шапкарова, нов член во тимот на Антолог

Марија Шапкарова е нов член во тимот на Антолог. Во продолжение следуваат нејзините омилени наслови од „Антолог.“

МЕМЕНТО ЗА ИСТАНБУЛ – Ахмет Умит

За овие студени декемвриски денови топло ви го препорачувам романот „Мементо за  Истанбул“. Оваа воодушевувачка, возбудлива и докрај неизвесна приказна, напишана со литературен стил, ќе ве прошета напред и назад низ историјата на еден од најстарите, најмистериозните и најимпресивните градови во светот, Истанбул. Седум угледни лица од разни професии се убиени и притоа кај секого од нив во дланката е оставена монета. Нивните тела се оставени пред седум антички споменици, значајни за градот. Кој и зошто го прави ова? Што сакаат сторителите да ѝ предочат на полицијата? Зошто секоја жртва ја поставуваат во положба да покажува во правец кон местото каде што ќе ја остават следната? Што нудат последните страници од овој возбудлив роман, откријте сами.

THE GAME – Алесандро Барико

Љубопитни сте да го откриете настанокот на современата технологија? Тогаш, ви ја препорачувам „Тhe Game“. Патуваме во светот на дигитализацијата, каде што Алесандро Барико нѐ води на една интересна авантура. Тој на мошне вешт, оригинален и низ игрив приказ успева да ја згасне жедта на љубопитните дечиња, така што ги носи на пловидба од безброј одговори распрснати во океанот на дигитализацијата. Започнуваме од копното наречено аналоген свет, па пловиме до островите на компјутерите, видеоигрите, дигитализацијата, мрежата, трговијата, вебингот, паметните телефони, друштвените мрежи, за да пристигнеме до архипелагот на апликациите и почетокот на иднината. Секој остров ги збогатува детската фантазија и знаење. Сигурно се запрашувате на каков начин. Тоа ќе го дознаете започнувајќи ја пловидбата.

 

 

ПОСЛЕДНАТА ДЕВОЈКА – Надија Мурад

Што се случува кога животот на една кревка девојка се менува преку ноќ, кога мирниот сон на село се претвора во суровa, одвратна, гнасна игра на судбината?

Дали Надија ќе успее да се оттргне од валканите раце на непријателите, да се издигне од амбисот и достоинствено да се бори за нанесената неправда? Ќе успеат ли да ја замолчат и да ја запрат во намерата да ги изнесе сторителите пред лицето на правдата?

А кои сме ние, читателите? Неми сведоци на еден непокорен дух. Ова не е вообичаен крик за помош, туку моќна, трогателна исповед, која ќе навлезе во секоја пора растопувајќи го најдебелиот слој од комфорноста на вашето битие.

 

РУЛЕТ – Лада Жиго

 

Транзиција. Почеток на хаос во едно општество. Општество во кое многу луѓе се препознаваат и се идентификуваат со главниот протагонист Анте. Дејството се одвива во 2008 година, во Република Хрватска. Луѓето се фрлени на берзата како луѓе без работа, луѓе без шанси. Суровиот капитализам ја наплаќа немилосрдно својата цена врз човечките животи, поробувајќи ги во бездната на „луѓе без својства“. Дали и кога ќе успее да се победи рулетот, метафората на хрватското општество и на човечкиот живот, да се победат во суштина неправдата и сопствената судбина? Рулетот вешто си поигрува со надежта исто како што општеството си поигрува со егзистенцијата.

 

 

БАБА МИ ВЕ ПОЗДРАВУВА И ВИ СЕ ИЗВИНУВА – Фредрик Бакман

 

Портретирајќи едноставни ликови со кои се поистоветуваме, Бакман дава реалистичен приказ на секојдневниот живот. Нѐ носи на една речиси волшебна авантура во која истовремено плачеме и се смееме, се восхитуваме и тагуваме. Бабата на Елса е вечно неуморно дете во душа, додека девојчето љубопитно патува во приказните обидувајќи се да најде засолниште за својата „различност“. Роман во кој ќе се вљубите уште од првата страница, не испуштајќи ја книгата од раце до самиот нејзин крај.

 

 

 

 

Напиши коментар

ул. „Ѓорѓи Пулевски“ бр. 29 лок.1 +389 2 3201 007 poddrska@antolog.mk

Пријави се за Антолог билтен за новости.

Дознај кои се најнови книги, понуди, попусти и друго


    Потврдувам дека сум постар од 16 години.
    YouTube
    LinkedIn
    Share
    Instagram