Опис
Малечката и болежлива Пилар ги воведува своите родители во нејзината игра. Секоја вечер го набљудуваат чудното цик-цак движење на семејството туристи од Германија по стрмнината наспроти нивниот дом на Тенерифе. Ова го инспирира нејзиниот татко да го напише романот „Третата карпа“ за „семејството туристи кое живее на сртот“. Приказната завршува со случајната смрт на едно од децата на туристите.
Четиричлено семејството од Берлин престојува еден месец на Канарските Острови. Таткото е писател, воодушевено го опишува канарскиот пејзаж, архитектурата на Тенерифе, „куќата во долината, каде што живее малечката Пилар“.
Навистина постојат двајца писатели и две нарации или сето тоа е фрагментиран внатрешен разговор на една личност? Кој пишува и за кого, и дали воопшто некој пишува? Од една страна е љубовта која се прелева (полиаморност) и силата на животот која неуморно се пробива низ најтесните процепи на океанот мртва природа околу нас. Од другата страна, постојаното демнење на смртта, која не одбира, не морализира, едноставно одзема. Како може да се живее понатаму кога смртта „без никакво објаснување“ одзема штотуку започнат живот?
